ورلڈ پنجابی کانگریس کی جانب سے 35ویں بین الاقوامی پنجابی کانفرنس ہفتہ 21 جون اور اتوار 22 جون 2025ء کو لاہور میں منعقد ہو گی

لاہور: ( فریدہ خانم ),
ورلڈ پنجابی کانگریس کے زیرِ اہتمام پنجاب، پنجابی اور پنجابیت پر 35ویں بین الاقوامی کانفرنس لاہور میں 21 سے 22 جون 2025ء تک پاک ہیریٹیج ہوٹل، ڈیوس روڈ، لاہور میں منعقد کی جائے گی۔ کانفرنس کا مرکزی موضوع پنجاب، پنجابی اور پنجابیت ہو گا جس کے ذیلی موضوعات خطے میں امن کا فروغ، امن اور صوفی ازم کے فروغ میں زبان اور ثقافت کا کردار ہوں گے۔ ورلڈ پنجابی کانگریس اس سے قبل دنیا بھر میں پنجابی ثقافت، ادب، صوفی ازم اور امن پر 34 بین الاقوامی کانفرنسیں منعقد کر چکی ہے۔ یہ 35ویں بین الاقوامی کانفرنس ہوگی۔ فخر زمان، چیئرمین ورلڈ پنجابی کانگریس نے سرحد پار کشیدگی کی وجہ سے مشکل وقت کے باوجود مسلسل بین الاقوامی کانفرنسوں کے انعقاد کے عزم کا اعادہ کیا۔ انہوں نے کہا کہ ایسی کانفرنسوں کے انعقاد کی اشد ضرورت ہے, جو اب اس حقیقت کے پیش نظر زیادہ اہمیت کی حامل ہے کہ ورلڈ پنجابی کانگریس کا ایک مقصد پنجابی زبان اور ثقافت کے فروغ کے ذریعے امن کو فروغ دینا ہے۔ انہوں نے اس بات کو بھی یقینی بنایا کہ وہ اس رفتار کو کم نہیں ہونے دیں گے جو دنیا بھر میں 34 بین الاقوامی کانفرنسوں کے انعقاد کے ذریعے طے کی گئی ہے۔ 34ویں بین الاقوامی کانفرنس جنوری 2025 میں منعقد ہوئی جس میں ہندوستان اور دنیا بھر سے 120 سے زیادہ دانشوروں، ادیبوں، شاعروں اور پروفیسروں نے شرکت کی۔ اس سے قبل ورلڈ پنجابی کانگریس سویڈن، فرانس، جرمنی، انگلینڈ، ایسٹونیا، نیدرلینڈز، آسٹریا، ناروے، اٹلی اور امریکا میں بھی ایسی کانفرنسوں کا انعقاد کر چکی ہے۔ 35ویں عالمی کانفرنس میں پنجاب بھر سے دانشور، شاعر، ادیب، پروفیسرز اور سکالرز شرکت کریں گے۔